ប្រទះឃើញសពបុរសម្នាក់អណ្តែតទឹកទន្លេ មិនទាន់ស្គាល់អត្តសញ្ញាណ

ថ្ងៃពុធ ទី៣០ ខែសីហា ឆ្នាំ២០១៧ ម៉ោង ១៥:៣៨ (30-08-2017 15:38)

រាជធានីភ្នំពេញ ៖ សពបុរសម្នាក់ត្រូវបានប្រជានេសាទប្រទះឃើញ អណ្តែតទឹកទន្លេ នៅចំណុចក្រោយហាងនំបុ័ងភ្នំពេញ ក្នុងភូមិផ្សារតូច សង្កាត់ទួលសង្កែ ខណ្ឌឫស្សីកែវ ដោយពុំស្គាល់អត្តសញ្ញាណឡើយ ។

ហេតុការណ៍នេះបង្កឲ្យមានការភ្ញាក់ផ្អើលកាលពីវេលាម៉ោង០៨និង៣០ព្រឹក ថ្ងៃទី៣០ ខែសីហា ឆ្នាំ២០១៧ ហើយនគរបាលក៏បាននាំគ្នាជួយស្រង់ដើម្បីត្រួតពិនិត្យ ។

សពបុរសនោះពុំត្រូវបានស្គាល់អត្តសញ្ញាណឡើយ មានអាយុប្រមាណជាង៣០ឆ្នាំ ស្លៀកខោខ្មៅជើងវែងអត់ពាក់អាវ ។

តាមព័ត៌មានឲ្យដឹងថា នៅមុនពេលកើតហេតុ មានប្រជានេសាទ ដែលបង់សម្លាញ់នៅតាមដងទន្លេសាប ក៏បានប្រទះឃើញសពបុរសម្នាក់អណ្តែតទឹក ក៏បានរាយការណ៍ប្រាប់នគរបាលមូលដ្ឋាន ក៏បង្កឲ្យមានការភ្ញាក់ផ្អើលតែម្តង ។ សពត្រូវបាននគរបាលស្រង់ឡើងគោក ដើម្បីត្រួតពិនិត្យ ។

តាមការត្រួតពិនិត្យ សពពុំមានស្លាកស្នាម ដែលបញ្ជាក់ថា សពត្រូវបានគេសម្លាប់នោះឡើយ ។ នគរបាលក៏បានសន្និដ្ឋានថា សពស្លាប់ដោយសារតែឈ្លក់ទឹក ។ គេពុំដឹងថា សពស្លាប់ដោយលង់ទឹក ឬលោតទឹកសម្លាប់ខ្លួន ពីកន្លែងណានោះទេ ។ បន្ទាប់ពីត្រួតពិនិត្យរួច សពត្រូវបាននគរបាលបញ្ជូនទៅកាន់វត្តទួលសង្កែ ដើម្បីរងចាំរកបងប្អូន ធ្វើបុណ្យតាមប្រពៃណី ៕