ពលរដ្ឋភ័យខ្លាចរត់ភៀសខ្លួន
ថ្ងៃអាទិត្យ ទី២៧ ខែសីហា ឆ្នាំ២០១៧ ម៉ោង ១៧:០០ (27-08-2017 17:00)
ប្រទេសមីយ៉ាន់ម៉ា ៖ ពលរដ្ឋស៊ីវិលដែលមានការភ័យខ្លាចកាលពីថ្ងៃទី២៦ សីហា ប៉ុនប៉ងរត់ភៀសខ្លួនចេញពីភូមិដាច់ស្រយាលទាំងឡាយនាភាគខាងលិចមីយ៉ាន់ម៉ា ដែលនៅទីនោះការប្រយុទ្ធគ្នានានារវាងកងកម្លាំងសន្តិសុខ និងពួកឧទ្ទាមអ៊ិស្លាមរ៉ូហ៊ីងយ៉ា បណ្តាលឱ្យមនុស្សស្លាប់ជាច្រើនសិបនាក់ ។ ពួកគេនាំគ្នារត់ភៀសខ្លួនទៅកាន់ប្រទេសបង់ក្លាដែស ។
ចាប់តាំងពីថ្ងៃទី២៥ សីហា មកការប៉ះទង្គិចគ្នារវាងកងកម្លាំងសន្តិសុខ និងពួកឧទ្ទាមរ៉ូហ៊ីងយ៉ា បណ្តាលឱ្យមនុស្សស្លាប់យ៉ាងតិច៩២នាក់ ក្នុងនោះមានសមាជិកកងកម្លាំងសន្តិសុខ១២នាក់។ ការប្រើអំពើហិង្សាកើតមាននៅរដ្ឋរ៉ាឃីន ដែលចាប់តាំងពីច្រើនឆ្នាំមកហើយ កើតមានភាពតានតឹងយ៉ាងខ្លាំង រវាងពួកជនជាតិភាគតិចរ៉ូហ៊ីងយ៉ាកាន់សាសនាអ៊ិស្លាម និងពួកពុទ្ធសាសនិក ។
យោងតាមអាជ្ញាធរថា នារី និងកុមាររ៉ូហ៊ីងយ៉ាប្រមាណជា២.០០០នាក់បានប្រមូលផ្តុំគ្នា កាលពីថ្ងៃទី២៦ សីហា នៅព្រំដែនជាមួយបង់ក្លាដែស ក៏ប៉ុន្តែពុំត្រូវបានអនុញ្ញាតឱ្យឆ្លងកាត់ឡើយ ។
រសៀលថ្ងៃទី២៦ សីហា កងទ័ពមីយ៉ាន់ម៉ា បានវាយប្រហារលើភូមិជាច្រើនរយ ។ គេឃើញបណ្តាជនស៊ីវិលរត់រកជម្រកពេលកងទាហានបាញ់នៅជិតប៉ុស្តិ៍ព្រំដែន GHUMDHUM ។ កងទាហានបាញ់កាំភ្លើងត្បាល់ និងកាំភ្លើងយន្តទៅកាន់កូនភ្នំទាំងឡាយជិតព្រំដែនបង់ក្លាដែសជាកន្លែងលាក់ខ្លួនរបស់ពួកឧទ្ទាមជាមួយជនស៊ីវិលដែលមានភាគច្រើន ។ ជនស៊ីវិលជាច្រើនរយនាក់បានឆ្លងកាត់ព្រំដែននាថ្ងៃទី២៦ សីហា ហើយមួយចំនួនហែលឆ្លងទឹកស្ទឹង NAF នៅ ព្រំដែន ។
ការប្រយុទ្ធគ្នានានាផ្ទុះឡើងកាលពីថ្ងៃទី២៥ សីហា ពេលមនុស្សច្រើនរយនាក់ជាយុទ្ធជនក្រុមឧទ្ទាម ARAKAN ROHINGYA SALVATION ARMY (ARSA) វាយប្រហារប៉ុស្តិ៍ប៉ូលិសជាង២០កន្លែងនៅរដ្ឋរ៉ាឃីន ។ នេះជាអំពើហិង្សាខ្លាំងក្លាពុំធ្លាប់មានចាប់តាំងពីច្រើនខែមកហើយ ៕
