ជនជាតិចិនបើករថយន្តធ្លាក់ប្រឡាយស្លាប់ត្រាំ១យប់
ថ្ងៃអង្គារ ទី២៩ ខែសីហា ឆ្នាំ២០១៧ ម៉ោង ១៦:០២ (29-08-2017 16:02)
ខេត្តកំពង់ឆ្នាំង ៖ បុរសជនជាតិចិនម្នាក់ បានបើករថយន្តធ្លាក់ប្រឡាយទឹកស្លាប់ក្នុងរថយន្ត កាលពីវេលាម៉ោង១០និង៣០នាទីយប់ ថ្ងៃទី២៦ ខែសីហា ឆ្នាំ២០១៧ នៅកំណាត់លើផ្លូវជាតិលេខ៥ ចន្លោះគីឡូម៉ែត៤០និង៤១ ស្ថិតនៅភូមិជន្លាត់ដៃ ឃុំស្វាយ ស្រុកសាមគ្គីមានជ័យ ខេត្តកំពង់ឆ្នាំង ។
លោកសមត្ថកិច្ចស្រុកសាមគ្គីមានជ័យ បានឲ្យដឹងថា ៖ ចំពោះករណីគ្រោះថ្នាក់ខាងលើនេះ គឺបង្កឡើងដោយរថយន្តម៉ាកកូរ៉ូឡា ពណ៌ស្លែ ពាក់ស្លាកលេខ ភ្នំពេញ ២H-៨៦១៤ បើកបរដោយជនជាតិចិនម្នាក់ឈ្មោះ ជាង ហួរ អាយុ៤៤ឆ្នាំ បម្រើការងារក្នុងរោងចក្រត្រី ដែលមានទីតាំងនៅក្នុងខេត្តកំពង់ឆ្នាំង មានទីលំនៅក្នុងភូមិត្នោតជ្រុំ សង្កាត់បឹងទំពុន ខណ្ឌមានជ័យ រាជធានីភ្នំពេញ ធ្វើដំណើរពីជើងទៅត្បូង ក្នុងល្បឿនយ៉ាងលឿន ។ ហើយក៏រេចង្កូតធ្លាក់ទឹកប្រឡាយ បណ្តាលឲ្យស្លាប់នៅក្នុងរថយន្ត ។
សមត្ថកិច្ចដដែលបានឲ្យដឹងទៀតថា ៖ ជនរងគ្រោះខាងលើ បានធ្វើដំណើរចេញពីខេត្តកំពង់ឆ្នាំង ទៅលេងផ្ទះនៅភ្នំពេញ តែម្នាក់ឯងទាំងយប់ តែពេលកំពុងធ្វើដំណើរមិនដឹងជាហេតុអី ទើបជនរងគ្រោះបើករថយន្តរេចង្កូតធ្លាក់ប្រឡាយទឹកស្លាប់ក្នុងរថយន្តបែបនេះ ។
ក្រោយពេលកើតហេតុ សមត្ថកិច្ចបានជួលរថយន្តស្ទួចមកស្ទួចយករថយន្ត និងសពឡើងមកលើគោក ហើយបានប្រគល់សពទៅខាងរោងចក្រ យកទៅរក្សាទុករង់ចាំយកទៅធ្វើបុណ្យតាមប្រពៃណីនៅស្រុកកំណើត ៕
No comments