បើបុកមនុស្សវិញមិនដឹងជាយ៉ាងណាទេ ឲ្យតែបើកបររបៀបហ្នឹង
ថ្ងៃអង្គារ ទី២៩ ខែសីហា ឆ្នាំ២០១៧ ម៉ោង ១៤:៣៦ (29-08-2017 14:36)
ខេត្តស្វាយរៀង ៖ រថយន្តធុនយក្សយីឌុប១គ្រឿងម៉ាក FUSO ពាក់ស្លាកលេខ ភ្នំពេញ ៣A-០៥៦៧ របស់ក្រុមហ៊ុន H.C បើកបរបុករះខឿនរង្វង់មូលផ្លូវជាតិលេខ១ ហោះឡើងបុករង្វង់មូលរូបនាគរួចហោះទៅបុករបងមន្ទីរអប់រំយុវជន និងកីឡាខេត្ត បាក់អស់២ផ្ទាំង ទៅមុខលែងរួច សមត្ថកិច្ចសង្ស័យថា តៃកុងស្ទើភ្លើង ។
ករណីបើករថយន្តបុករះនេះ កើតឡើងនៅវេលាម៉ោង០៣និង១៥នាទីទាបភ្លឺ ថ្ងៃទី២៩ ខែសីហា ឆ្នាំ២០១៧ នៅលើកំណាត់ផ្លូវជាតិលេខ១ ត្រង់ចំណុចរង្វង់មូលរូបនាគ ខាងមុខសាលាដំបូងខេត្តស្វាយរៀង ស្ថិតនៅភូមិស្រះវង្ស សង្កាត់ស្វាយរៀង ក្រុងស្វាយរៀង ។ បើតាមប្រជាពលរដ្ឋបានឃើញហេតុការណ៍ផ្ទាល់ភ្នែក បានឲ្យដឹងថា មុនពេលកើតហេតុ គេឃើញរថយន្តបង្ក បើកបរពីទិសខាងកើតទៅលិចយ៉ាងលឿន ចំកណ្តាលថ្នល់ បុកខឿនរង្វង់មូល បាក់ស្លាកសញ្ញាចរាចរណ៍ហោះប្លោងទៅបុករង្វង់មូលរូបនាគបែកខ្ទេច ហើយហោះបុកខឿនរួចហោះទៅបុករបងមន្ទីរអប់រំយុវជន និងកីឡាខេត្តស្វាយរៀង បាក់អស់២ផ្ទាំង ទើបទៅមុខលែងរួច ។
បន្ទាប់មកក៏ឃើញអ្នកបើកបរ និងអ្នករួមដំណើរបើកទ្វារថយន្តចេញមកក្រៅ ពុំមានឃើញរបួសទេ ហើយបានចុះដោះស្លាកលេខ រួចនាំគ្នាគេចខ្លួនបាត់ស្រមោល បន្សល់ទុករថយន្តនៅកន្លែងកើតហេតុ ។ រថយន្តខូចផ្នែកខាងមុខយ៉ាងដំណំ ដាច់ភ្លៅ និងកង់មុខ ៕
No comments