កម្ពុជាស្នើឱ្យសហរដ្ឋអាមេរិកពិនិត្យលើប្រព័ន្ធអនុគ្រោះពន្ធឡើងវិញ
ថ្ងៃអង្គារ ទី២៩ ខែសីហា ឆ្នាំ២០១៧ ម៉ោង
១២:៣០ (29-08-2017 12:30)
រាជធានីភ្នំពេញ ៖
ប្រព័ន្ធអនុគ្រោះពន្ធទូទៅ(GSP) ជាកម្មវិធីពាណិជ្ជកម្មរបស់សហរដ្ឋអាមេរិកដែលត្រូវបានបង្កើតឡើងដើម្បីលើកកម្ពស់កំណើនសេដ្ឋកិច្ចនៅក្នុងប្រទេសកំពុងអភិវឌ្ឍន៍
តាមរយៈការផ្តល់ជូននូវធាតុចូលមិនគិតពន្ធដល់ផលិតផលចំនួន៤.៨០០ប្រភេទពីប្រទេសគោលដៅដែលបានកំណត់ចំនួន១២៩ប្រទេស
។
ខណៈដែលសហរដ្ឋអាមេរិកកំពុងប្រកាសឲ្យបណ្ដាប្រទេសកំពុងអភិវឌ្ឍន៍ដែលនឹងត្រូវទទួលផលក្រោមច្បាប់នេះ
កម្ពុជាក៏បានស្នើឲ្យអាមេរិកពិនិត្យឡើងវិញនូវលក្ខខណ្ឌអនុគ្រោះពន្ធនេះផងដែរ
។
ក្នុងជំនួបពិភាក្សាការងារជាមួយលោកស្រី Marta
Prado នាយកកិច្ចការអាស៊ីអាគ្នេយ៍ និងប៉ាស៊ីហ្វិក
តំណាងពាណិជ្ជកម្មសហរដ្ឋអាមេរិក កាលពីដើមសប្ដាហ៍មុន លោក ឱក ប៊ុង
រដ្ឋលេខាធិការក្រសួងពាណិជ្ជកម្ម
បានស្នើឲ្យសហរដ្ឋអាមេរិកដាក់បញ្ចូលមុខទំនិញសំខាន់ៗរបស់កម្ពុជា រួមមាន
សម្លៀកបំពាក់ ផលិតផលធ្វើអំពីឡែន និងផលិតផលផ្សេងទៀត
ស្ថិតនៅក្នុងលេខកូដ៣៣៨, ៣៣៩, ៣៤៧,
៣៤៨, ៦៤៧, ៦៤៨,
៣៣៤, ៦៣៤, ៦៣៨,
៦៣៩, ៣៣៥ និង៦៣៥
ឲ្យស្ថិតក្នុងប្រព័ន្ធអនុគ្រោះពន្ធ (GSP) ដើម្បីធានាថា
កម្ពុជានឹងទទួលបានអត្ថប្រយោជន៍ពិតប្រាកដពីការនាំចេញទៅកាន់សហរដ្ឋអាមេរិក
។
ក្នុងឱកាសនោះ
លោករដ្ឋលេខាធិការបានឲ្យដឹងថា
យោងតាមស្មារតីនៃសេចក្តីប្រកាសរួមរបស់សន្និសីទថ្នាក់រដ្ឋមន្ត្រីនៅទីក្រុងហុងកុង
រដ្ឋាភិបាលសហរដ្ឋអាមេរិកបានសន្យាថា នឹងផ្តល់ឲ្យប្រទេសអភិវឌ្ឍន៍តិចតួច
ក្នុងនោះរួមមានកម្ពុជាផងដែរ
នូវការអនុគ្រោះពន្ធនាំចូលទៅកាន់ទីផ្សារសហរដ្ឋអាមេរិកឲ្យបានយ៉ាងតិច៩៧%
ក្នុងលក្ខខណ្ឌពន្ធគយសេរី-កូតាសេរី (GSP-DFQF) របស់អង្គការពាណិជ្ជកម្មពិភពលោក
ប៉ុន្តែគិតមកត្រឹមឆ្នាំ២០១៧នេះ ប្រទេសដែលជាដៃគូពាណិជ្ជកម្មធំបំផុតទី២របស់កម្ពុជាមួយនេះ
បានផ្តល់នូវការអនុគ្រោះពន្ធត្រឹមតែ៨២,៦%ប៉ុណ្ណោះ ។
លោករដ្ឋលេខាធិការបន្ថែមថា
មុខទំនិញដែលសហរដ្ឋអាមេរិកបានផ្តល់ឲ្យកម្ពុជាក្នុងរង្វង់៨២,៦%នោះ មិនមានផលិតផលសក្តានុពលសំខាន់ៗដែលកម្ពុជាអាចផលិត
និងនាំចេញទៅកាន់ទីផ្សារសហរដ្ឋអាមេរិក ក្នុងនាមជាប្រទេសក្រីក្រទេ
ពោលគឺផលិតផលសក្តានុពលទាំងនោះ
ត្រូវជាប់កាតព្វកិច្ចបង់ពន្ធដូចបណ្តាប្រទេសអភិវឌ្ឍន៍នានាដទៃទៀត
ដែលមានសេដ្ឋកិច្ចរីកចម្រើនជាងកម្ពុជាដែរ ។
ការលើកឡើងទៅកាន់តំណាងពាណិជ្ជកម្មសហរដ្ឋអាមេរិកនាពេលនេះ
ក៏មានការគាំទ្រពីសមាគមរោងចក្រកាត់ដេរនៅកម្ពុជា ហៅកាត់ថា GMAC
ផងដែរ ដោយកាលពីថ្ងៃទី២៨ សីហា ម្សិលមិញ
សមាគមនេះបានចេញសេចក្ដីប្រកាសព័ត៌មានមួយគាំទ្រចំពោះសំណើរបស់ក្រសួងពាណិជ្ជកម្ម
ទៅកាន់រដ្ឋាភិបាលសហរដ្ឋអាមេរិក
ក្នុងការពិចារណាផ្តល់ការអនុគ្រោះពន្ធបន្ថែមទៀតដល់កម្ពុជា ។
លោក កាំង ម៉ូនីកា
អគ្គលេខាធិការរងនៃសមាគម
ត្រូវបានស្រង់សម្តីនៅក្នុងសេចក្តីប្រកាសបញ្ជាក់ថា GMACបានគាំទ្រក្រសួងពាណិជ្ជកម្ម ក្នុងការស្នើសុំសហរដ្ឋអាមេរិកឱ្យពិនិត្យឡើងវិញនូវGSPសម្រាប់កម្ពុជា «ដើម្បីឱ្យប្រទេសក្រីក្រនេះទទួលបានការចូលទីផ្សារបន្ថែមទៀត»
។
លោកបានមានប្រសាសន៍ថា ៖«
យើងសូមអរគុណពួកគេ [មន្ត្រីពាណិជ្ជកម្មអាមេរិក]
បានជួបជាមួយអ្នកពាក់ព័ន្ធទាំងអស់ ដើម្បីបានឃើញនូវរូបភាពពេញលេញនៃប្រទេសកម្ពុជា
។ GMAC គាំទ្រសំណើរបស់ក្រសួង
និងចង់អំពាវនាវដូចគ្នាទៅកាន់រដ្ឋាភិបាលសហរដ្ឋអាមេរិក » ។
« គួរតែមានការគិតគូរដ៏សមហេតុផលមួយសម្រាប់កម្ពុជា
នៅពេលដែលប្រទេសនេះបានអនុវត្តល្អក្នុងការធ្វើឱ្យប្រសើរឡើងនូវលក្ខខណ្ឌការងារក្នុងវិស័យកាត់ដេរ
និងស្បែកជើង ។ ឥឡូវនេះ
កម្មករបានទទួលប្រាក់ខែសមរម្យដោយអនុញ្ញាតឱ្យគ្រួសារជាច្រើនចាកចេញពីភាពក្រីក្រ
» ។ នេះបើតាមលោក កាំង ម៉ូនីកា ។
លោកបន្តទៀតថា
ការធ្វើឱ្យប្រសើរឡើងនូវលក្ខខណ្ឌការងារសម្រាប់កម្មកររោងចក្រ
គឺជាលក្ខណៈវិនិច្ឆ័យសំខាន់មួយដែលកំណត់ដោយសហរដ្ឋអាមេរិក
នៅពេលនិយាយដល់ការផ្តល់ការអនុគ្រោះពន្ធ ។
ចំណែកលោកស្រី Marta Prado នាយកកិច្ចការអាស៊ីអាគ្នេយ៍ និងប៉ាស៊ីហ្វិក
តំណាងពាណិជ្ជកម្មសហរដ្ឋអាមេរិក ក៏បានស្នើឲ្យភាគីកម្ពុជាពិនិត្យឡើងវិញនូវមុខទំនិញដែលកម្ពុជាទទួលបានការអនុគ្រោះពន្ធពីសហរដ្ឋអាមេរិក
ស្របពេលអាមេរិកបាននិងកំពុងប្រកាសឲ្យបណ្តាប្រទេសដែលនឹងត្រូវទទួលផលក្រោមច្បាប់របស់ខ្លួន
ពិនិត្យឡើងវិញនូវប្រព័ន្ធអនុគ្រោះពន្ធ (GSP) សម្រាប់
ឆ្នាំ២០១៧ ។
គួររំលឹកថា
រដ្ឋាភិបាលសហរដ្ឋអាមេរិកកំពុងពិនិត្យឡើងវិញក្នុងការផ្តល់នូវប្រព័ន្ធអនុគ្រោះពន្ធ
GSP ដល់បណ្តាប្រទេសដែលមានការអភិវឌ្ឍតិចតួច
លើប្រភេទមុខទំនិញស្បែកជើងនៅត្រឹមដំណាច់ខែធ្នូ ខាងមុខនេះ ខណៈខាងសមាគម GMAC
ក៏កំពុងរៀបចំឯកសារពាក់ព័ន្ធនានាដើម្បីដាក់ញ្ញត្តិនាពេលខាងមុខផងដែរ
។
យោងតាមអគ្គនាយកដ្ឋានគយ និងរដ្ឋាករកម្ពុជា
បានឱ្យដឹងថា ការនាំចេញសម្លៀកបំពាក់ និងស្បែកជើង
ដែលតំណាងឲ្យ៧៨%នៃការនាំចេញសរុបរបស់ប្រទេសកម្ពុជា បានកើនឡើង៧,២% ស្មើនឹង៧,៣ពាន់លានដុល្លារនៅឆ្នាំ២០១៦
កើនឡើងពី៦,៨ពាន់លានដុល្លារក្នុងឆ្នាំ២០១៥ ៕
No comments